៧ចំណុចដែលសហគ្រិនគ្រប់រូបត្រូវដឹងមុនពេលចុះបញ្ជីក្រុមហ៊ុន

 ការចុះបញ្ជីអាជីវកម្ម គឺជាចំណុចដ៏សំខាន់មួយដែលម្ចាស់អាជីវកម្មជាច្រើនចង់ចេះ ចង់ដឹងខ្លាំងមែនទែន ទាក់ទងនឹងចំណុចសំខាន់ៗដែលត្រូវធ្វើ ជំហានដែលត្រូវដើរ ឬគុណសម្បត្តិ គុណវិបត្តិ នៃការចុះបញ្ជីជាដើម

ចំណុចទី១ ត្រូវដឹងថាហេតុអ្វីបានជាគាត់ត្រូវចុះបញ្ជី?
ហេតុផលធំៗគឺដើម្បីធ្វើឱ្យអាជីវកម្មស្របច្បាប់ដែលបានកំណត់ និងដើម្បីបង់ពន្ធចូលរដ្ឋធ្វើឱ្យត្រូវជាមួយកាតព្វកិច្ចជាពលរដ្ឋល្អ ដើម្បីកសាងទំនុកចិត្តជាមួយដៃគូអាជីវកម្ម អ្នកវិនិយោគ និង អតិថិជនជាដើម។ ជាមួយគ្នា ម្ចាស់អាជីវកម្មត្រូវយល់ដឹងថា ត្រូវប្រើលិខិតស្នាមចុះបញ្ជីយ៉ាងណាខ្លះ ដើម្បីអាចទាញយកប្រយោជន៍ផ្សេងៗ ចេញពីការចុះបញ្ជីអាជីវកម្មនោះ។​

ចំណុចទី២ ត្រូវដឹងច្បាស់ពីសកម្មភាពចម្បងរបស់ក្រុមហ៊ុន ឬអាជីវកម្មខ្លួន​
ត្រង់នេះសម្ដៅទៅលើគោលបំណងធំរបស់អាជីវកម្ម ពាក់ព័ន្ធនឹងសកម្មភាពផ្សេងៗ ដើម្បីអាចរកប្រាក់ចំណូលឱ្យអាជីវកម្ម។ មួយវិញទៀត សកម្មភាពដែលគាត់ត្រូវផ្តោតគឺ សកម្មភាពដែលអាចរកចំណូលឱ្យក្រុមហ៊ុនជាប្រចាំ។ យ៉ាងណាមិញនៅក្នុងការចុះបញ្ជីនៅក្រសួងពាណិជ្ជកម្ម អ្នកអាចដាក់សកម្មភាពលើសពីមួយ បើសិនជាអ្នកចុះបញ្ជីជាក្រុមហ៊ុននីតិបុគ្គល។ ផ្ទុយទៅវិញ បើសិនជាចុះជាប៉ាតង់វិញ ប៉ាតង់មួយសំរាប់ សកម្មភាពអាជីកម្មមួយ ដូច្នេះម្ចាស់អាជីវកម្មត្រូវតែច្បាស់ថា តើសកម្មភាពណាដែលជាសកម្មភាពចម្បងដែលរកចំណូលឱ្យក្រុមហ៊ុន។ 

ចំណុចទី៣ ត្រូវដឹងពីទម្រង់អាជីវកម្មដែលត្រូវចុះបញ្ជី
ទម្រង់អាជីវកម្មដែលត្រូវចុះបញ្ជីនៅក្រសួងពានិជ្ជកម្មគឺមានទម្រង់ខុសៗគ្នាដូចជា
១. ក្រុមហ៊ុននីតិបុគ្គល (ការទទួលខុសត្រូវមានកម្រិត) ២. សហគ្រាស សហកម្មសិទ្ធ ៣. អាជីវកម្មរូបវន្តបុគ្គលជាដើម។ 

ចំណុចទី៤ ត្រូវដឹងពីទំហំនៃអាជីវកម្ម
នៅក្នុងចំណុចនេះគឺយើងមិនអាចកំណត់ខ្លួនឯងទេ ពោលគឺត្រូវបានកំណត់ដោយប្រព័ន្ធច្បាប់ពន្ធដារ។ ប៉ុន្តែម្ចាស់អាជីវកម្មក៏ត្រូវដឹងផងដែរថា អាជីវកម្មរបស់ខ្លួនជាប់ពន្ធកម្រិតណាមួយដូចជា ពន្ធតូច ពន្ធមធ្យម និងពន្ធធំជាដើម។ 

ចំណុចទី៥ ត្រូវដឹងពីចំនួនដើមទុនកំណត់ក្នុងលក្ខខន្តិក
ត្រង់នេះសំខាន់ណាស់ សម្រាប់ការចុះបញ្ជីក្រុមហ៊ុននិតិបុគ្គល។ ក្នុងចំណុចនេះម្ចាស់អាជីវកម្មត្រូវដឹងថាតើដើមទុនប៉ុន្មានដែលដាក់ក្នុងលក្ខខន្តិកនេះមានភាពសមស្រប ព្រោះដើមទុននេះជាដើមទុនត្រៀមសម្រាប់ការចំណាយផ្សេងៗ ឬពេលខាត។ ក្នុងចំណុចនេះ ការដាក់ដើមទុនច្រើនពេកក៏មិនសូវល្អញ្រោះជាចំនួនទទួលខុសត្រូវចំពោះមុខច្បាប់ ដាក់តិចពេកក៏មិនល្អដែរព្រោះបើចំណាយអស់មុនពេលមានចំណូល ក្រុមហ៊ុនត្រូវស្នើសុំបន្ថែមដើមទុន ឬប្រកាសក្ស័យធន។ 

ចំណុចទី៦ ត្រូវកំណត់ការិយាល័យចុះបញ្ជីអាជីវកម្ម
វាជារឿងសំខាន់មួយដែលម្ចាស់អាជីវកម្មមួយចំនួនមើលរំលង ពោលគឺគាត់អាចប្រើទីតាំងណាមួយដែលមិនមានឯកសារយោងត្រឹមត្រូវ ឬទីតាំងដែលមិនមែនជាការិយាល័យពិតប្រាកដដើម្បីចុះបញ្ជី ធ្វើឱ្យមានបញ្ហា ឬចុះមិនបាន នៅពេលដែលមន្រ្តីពន្ធដារ ចុះពិនិត្រទីតាំងឃើញថាខុសប្រក្រតី។ 

ចំណុចទី៧ ត្រូវរកអ្នកពិគ្រោះយោបល់ ឬទីប្រឹក្សា
ដើម្បីជួយសម្រួលដល់កិច្ចការងារក្នុងការចុះបញ្ជីឱ្យកាន់តែមានភាពងាយស្រួល កាត់បន្ថយអត្រារាំងស្ទះ និងហានិភ័យផ្សេងៗ អ្នកគួរតែរកក្រុមហ៊ុនពិគ្រោះយោបល់ ឬប្រឹក្សាផ្សេងៗ ដើម្បីបង្ការនូវបញ្ហាក៏ដូចជាថែទាំអាជីវកម្មឱ្យបានត្រឹមត្រូវ ជៀសវាងការផាកពិន័យផ្សេងៗ។

ប្រសិនបើលោកអ្នកចង់ស្វែងយល់បន្ថែមឱ្យកាន់តែស៊ីជម្រៅ លោកអ្នកអាចទំនាក់ទំនងលោក ដើម្បីប្រឹក្សាដោយផ្ទាល់បាន តាមរយៈលេខទំនាក់ទំនង ០៧០៩១៤២០១ ៕ 

អត្ថបទនេះក៏ត្រូវបានផ្សព្វផ្សាយនៅលើគេហទំព័រផ្លូវការរបស់ Business Cambodia ផងដែរ។ https://www.business-cambodia.com/article/mr-kong-kimsophat-founder-making-it-easy-co-ltd​